Friday, August 10, 2007

2004 smashed my heart

شوارب : ها اشلونج ابلة ناني اليوم اول يوم مدرسة شاده حيلج مو نفس السنة اللي طافت تبلشينا
شباصات : تبتسم لا انشالله هالسنة باعتمد على روحي والعيون محمصة وفيها النوم والشعر مسمت بالعجفة من الصبح
شوارب : اشفيج هذا اول يوم لازم تصحصحين وتصيرين نشيطة عاد انتي تذكريني بايام الدراسة اول الايام كله مخثل بعدين اشد حيلي ولا منتي نفس شوارب
شباصات : "روووح بتشقق الحلج عاد اهي ما تقصر وكل مازادت بلاويها شقت حلجها بالكشره " بس هالحجي ياثر اذا من شوارب وعلى الصبح وانا نازلة من السيارة كلامه المعتاد الله يوفقج ويبعد عنج عيال الحرام
بعد ما تخرجت من الثانوية العامة علمي "بين قوسين علامة خطر" يعني هلاك
شباصات : ها شوارب ادق على اي سفارة عشان اقدم على الجامعة "احنا متفقين انا اتخرج وادرس طب اسنان بالبحرين " وكنا متفقين على كل شي حته السكن والجامعة
شوارب : لا حبيبتي انا ما عندي بنات يسافرون ويدرسون بروحهم لازم محرم ما عندنا عادات الغرب شنو احنا مو مسلمين
شباصات : انخرست ونملت الريول وطبعا البنات خبرة بخظة البطن الي تيي لما ننصدم واذوني سكرت ويهي خو بروحه قصه ثانية العيون انقلبوا فناييل والحلج وصل لي للركب
المهم .......
زوجة شوارب : لا يا شوارب الله يهداك مو جذي تقفلها بويها انته واعدها وقايلها وشباصات متزهبه وحالتها حاله انزين اي جامعه حته لو انتساب
شوارب : نظره ما يعلم فيها الا ربنا جان يقول انتوا تفهمون شنو ماكو سفر شباصات بروحها بره ولا لا انتو تفهمون عربي
طبعا زوجة شوارب ويها يقول لو مو متليقفة مو احسن
شباصات : بلعت ريجها جان تقول بكل هدوء "وطبعا هذا عكس طبعها تماما" يعني راح ادش التكنلوجيا ؟
شوارب : مافيها شي وبعدين كملي هندسة بديرتج ومع اهلج مافيها شي يالله انا بلحق على الصلاة ولا يكون تبطلون موضوع السفر لانه انا الحين انه ضغطي مرتفع والسبه انتو
شباصات : ودها تصرخ من غير ويعة قلب وتبجي بس الله كريم
زوجة شباصات : وبعدين تعالي التكنلوجيا يعني فني لج هالكثر ولج هالكثر وهالسوالف اللي ما تخلص
طبعا شباصات الحين تبي مخها يحول صورة الطبيبة لما فنية هاذي بروحها قصة بروحها المهم قدمت وانقبلت تخصصت مختبرات كيمياء كثر ما تقولون لعبت وسرحت ومرحت وقصيت محاضرات لي قبل لما وقعت انذار معدل اول بعدين ثاني بعدين فصل
شوارب : و لا تبين طب بعد جان فاصلينج من سنة يدي وانتي هناك ما خذتها سياحة
شباصات تبي هدومها اللي عليها لانه شوارب ما قصر فيها هالمرة وبنهاية الزف امانة انا شلت حدث ما قلته لانه يضيق خلقي واحس انه شخصي زيادة عن اللزوم المهم فانا كاسره خاطره من هالحدث وبنفس الوقت ضايق خلقة علي ليش قاعد يصير فيني جذي اي نرد حق سالفتنا بنهاية الزف جان يخر عاد اللي ما قاله خير شر من انولدت ماقاله يوم صار عمري 21 سنة قاله لي اللي اهوه
شوارب : شوفي عاد انا بقولج هالشي اللي ما تدري عنه حته زوجتي ما قلت لها ترى انا طول عمري اقول شباصات طبعها اسلوبها تصرفاتها غير عن الشباصات اللي بالبيت كلهم هاذي راح تطلع شي مو هين بس انتي صدمتيني انج انفصلتي
شباصات : تنخ وترجع لي وره "جود اكسر خاطره ويدق على السفارة البحرينية" عشان الجامعه
شوارب :ابيج من باجر تقدمين على الهيئة وتشوفين الاماكن اللي تقبلج تسمعين
شباصات : من داخل تقول ليش ياربي حياتي واهو يسيرها على كيفه طبعا اكيد قلت انشالله
بعد فتره لقيت اني ما انقبل الا بالمعاهد واثنينه المهارات او السكرتارية بس انقبلت بالمهارات طبعا يوم حطوا بالجرايد اهوه كان بالدوام جان ادق عليه
شباصات : صباح الخير شوارب اشلونك انا انقبلت بمعهد المهارات
شوارب : انا قلت لج لا تحطينه من ضمن رغباتج بس هذا اللي انتي تبينه ولي فات الفوت ما ينفع الصوت طوط ..طوط..طوط..طوط
من غير مع السلامة
زوجة شوارب : كلووولووووووووش الحمدالله العوض ولا القطيعه حمدي ربج وشكريه رفعي معدلج وحولي اي مكان بعدين
شباصات : مستانسة وضايق خلقها بنفس الوقت
سنة 2004 دفنتني يالحياة ورديت طلعت الف الحمدلله والشكر من الاحداث اللي صارت فيها
شباصات باختصار اول كورس ماكو رفيجات عندها سيارة قبل سايق صايرة سيدة ماكو طلعات وروحات اول كورس امتياز الثاني امتياز الثالث امتياز
شوارب : ماشالله صافتهم بالشهادة اي لانج تبين الامتياز يبتيه اذا جذيه كملي لي تخرجتي بس ماكو تخصصج بالجامعات الي اهني جان تروحين البحرين سكن طالبات تكملين السنتين وتيين
شباصات : اي شوارب ليش لا انا بعد بييب امتياز لما اتخرج
شباصات تخرجت امتياز
شوارب : دقي على السفارة شوفي اي جامعة وسالي عن الانتساب والدراسة النوعين شي اهون من شي
شباصات : انشالله على امرك حته عن عروق ...... بسالهم
شباصات : الو السلام عليكم السفارة البحرينية لو سمحت بغيت اسال عن الجامعات وعن الرسوم عشان سكن الطالبات و...
السفارة : آسف اختي بس مافي سكن انلغى السكن لانه صارت فيه شاكل وايد اقدر اسال عن الجامعات بس
شباصات : خنقتها العبرة لا شكرا اخوي
شوارب : بس خلاص الله مو كاتب لج اقتنعي باللي هني وشوفي هالجامعات الخاصة وهالسوالف
عشان افتك من هالدوامة اللي براسي كالعاده كل صيف ادش لوياك ينسيني الهم والبلاوي الزرقة اللي فيني لما خلصت الفتره ضاق خلقي وقاعده اسويلي سيرة ذاتية وهالاشياء جان ايي ذاك اليوم
شوارب : انتي ليش فاقده الامل انشالله الله يقدرني واخليج تكملين بس انتي سالي هالجامعات سالي جامعة الخليج خوش طلبة اللي فيها عيال حمولة ناس اوادم
شباصات : اول شي انزل بوست بعدين ادق على الجامعه
شباصات : الو السلام عليكم بغيت اسال الله يعافيج عن تكملة الدبلوم
جامعة الخليج : هلا حبيبتي خريجة شنو اي معهد
شباصات : معهد السياحة والتجميل والازياء
جامعة الخليج : لالا شنو هالمعهد احنا نقبل من التطبيقي بس التكنلوجيا والتجاري
شباصات : مشكورة بقلبي " عمى بعينج مافي اسلوب احسن من جذيه ويعه تاخذج "
شوارب : مو قلت لج توظفي وبعد سنتين طلبي اجازة دراسية
شباصات : بكل هدوء شوارب انته لما صرت عسكري وترقيت لما صار مسماك عقيد شاورت احد اخذت راي احد؟؟
شوارب : ليش تسالين ؟؟
شباصات : لما رحت دوراتك اللي بامريكا شاورت احد ؟؟
شوارب طقته البوهه جنه قايلين له اصحى يانايم
شباصات : شوارب بعد ئذنك هاذي حياتي ومابي اي شي ياثر علي لانه بعدين راح ايي واقولك منك صار هالشي
شوارب : انا كنت ابي ابين لج الطريج الصح من غير تعب وانتي كيفج وانا بعد مالي شغل فيج سوي اللي تبينه بس مو تييني بعدين تشتكين بقولج انجلعي عن ويهي ولاني رادها
شباصات : نفس عميق زين ما اشفطت البيت والحين قررت تسوي سيرة ذاتية وتقدم على ثلاث اماكن والتكملة انشالله بعد ما اثبت بوظيفة
بنهاية هالبوست انا ما ادري ليش تذكرت هالشي الحين وكتبته يمكن تشوفونه شي خاص اشوي عن حياتي بس لاني دايما اقول اللي خذا الشهادة الجامعية مو احسن مني في بعضهم عندهم عيال وبعضهم ما عندهم خدم انا الحمدالله حالتي زينة ومرات اقول يمكن تدخل شوارب بكل شي اهوه اللي خلاني ما اهتم بولا شي لاني كنت عارفة كل شي راح يصير مثل ما اهو يبي فمافي داعي اني ابني احلام لانها ماراح تصير وانا الحين اعاني من مشكلة صايره بيني وبينه من قبل 4 ايام ودايمن تيي في بالي كلمته انتي غير عنهم كلهم اقول دام انه يدري اني غير ليش يصكك كل شي بويهي بالاخير "جان زين كل شباصة تختار الشوارب اللي تعيش معاها او الشوارب تختار الشباصات اللي تعيش معاها بالبيت "

2 comments:

78o8eYa said...

ايه يا حبيبتي

الدنيا جذيه

..

كل شباصه
وراها شوارب تطلع عينها
:$

ان ما كان قدرج
راح يكون بإختيارج

نانووه
ربي يكتبلج خير مافي غيبه

قولي
آاآميــن

^_^

Nany said...

hala wala 7bebty
etha 3lla shwareb rbech
yafrejha :)
آمـــــــــــيـــــــــــــن